Athinë – Protesta masive kanë përfshirë të gjithë Greqinë, me mijëra qytetarë që janë ngritur në revoltë dy vite pas përplasjes tragjike të dy trenave që shkaktoi vdekjen e 57 personave.

Tragjedia e ndodhur më 28 shkurt 2023 në luginën e Tempes është cilësuar si aksidenti më i rëndë hekurudhor në historinë e Greqisë. 57 viktimat, shumica prej tyre studentë, humbën jetën kur një tren pasagjerësh u përplas kokë më kokë me një lokomotivë mallrash.

Sot, dy vite pas ngjarjes, qytetarët kanë dalë në rrugë duke kërkuar drejtësi dhe llogaridhënie nga autoritetet. Protestat janë shoqëruar me tensione dhe përplasje me policinë, ndërsa në Athinë një prej protestuesve u plagos dhe u dërgua me urgjencë në spital.

Partia opozitare PASOK, në një deklaratë publike, u shpreh:
“Sot, në çdo cep të atdheut tonë, populli grek qëndron pranë familjeve që luftojnë për shfajësimin e kujtimit të të dashurve të tyre që humbën jetën padrejtësisht. Ne kërkojmë drejtësi dhe të vërtetën. Përgjegjësit duhet të dalin para gjykatës dhe shteti duhet të tregojë respekt për qytetarët e tij, duke mos u kthyer në plaçkë të pushtetit.”

Qytetarët kanë akuzuar qeverinë për neglizhencë dhe mungesë përgjegjësie në garantimin e sigurisë në transportin hekurudhor, ndërsa autoritetet ende nuk kanë dhënë një përgjigje të qartë për kërkesat e tyre.

Protestat pritet të vazhdojnë në ditët në vijim, ndërsa Greqia përballet me një tjetër moment kritik përballë zemërimit qytetar dhe kërkesave për reformë në sistemin hekurudhor.