Fadi Alwan, një 49-vjeçar palestinez, është shpallur në kërkim për vrasjen e gruas së tij, Rayyan Alwan, 24 vjeçe, në një apartament të marrë me qira në Tiranë, në rrugën Gjon Muzaka. Vrasja dyshohet të ketë ndodhur për shkak të marrëdhënieve familjare mes çiftit.

Ngjarja e rëndë dyshohet të ketë ndodhur më 22 shkurt, kur Fadi Alwan ka masakruar gruan e tij me thikë. Pas kryerjes së krimit, ai ka mbuluar trupin e pajetë të gruas me çarçaf dhe është larguar nga banesa me qetësi. Trupi i viktimës është gjetur pesë ditë më vonë, më 27 shkurt, me plagë të shumta në trup.

Hetimet po vazhdojnë për të përcaktuar saktësisht kohën e ngjarjes dhe për të siguruar prova për të dokumentuar këtë vrasje. Grupi hetimor ka dyshime të forta se bëhet fjalë për një vrasje të paramenduar, duke analizuar veprimet e autorit. Sipas informacionit, Fadi Alwan ka larguar mjetet e identifikimit, telefonin dhe çdo send personal të gruas pas krimit.

Pasi ka lënë banesën ku ishin akomoduar, Fadi Alwan është regjistruar në kamerat e sigurisë duke u larguar nga zona e Kavajës dhe më pas është drejtuar për në Greqi, ku ka mbërritur më datë 22 shkurt. Policia po punon për të lokalizuar dhe kapur autorin, ndërkohë që hetimet janë duke u fokusuar edhe në informacionet mbi prenotimin e çiftit dhe dokumentet që ata kanë përdorur.

Çifti, të cilët jetonin në Gjermani, kishin mbërritur në Shqipëri më 19 shkurt, duke udhëtuar nga Rinas dhe duke u akomoduar në një apartament në Bllokun e Ambasadave. Sipas hetimeve, ata kishin përdorur dokumente greke për hyrjen në Shqipëri.