Procesi i primareve në Partinë Demokratike u zhvillua sot në të gjithë vendin, ku anëtarët votuan për të përzgjedhur kandidatët për deputetë. Deri në orën 16:00, mbi 41 mijë anëtarë kishin marrë pjesë në votim.

Në disa qytete, procesi u shoqërua me vonesa dhe problematika. Në Fier, votimi u mbyll me 1 orë e 20 minuta vonesë, ndërsa në Shkodër u raportuan 1785 votues. Në Vlorë, votuan 867 anëtarë nga 2300 të regjistruar, ndërsa në Tiranë, kutitë e votimit do të mblidhen në selinë e PD-së, ku do të bëhet edhe numërimi publik.

Probleme dhe polemika në proces

Procesi i primareve nuk ka qenë pa sfida. Në Pogradec, janë kapur tesera false, ndërsa në disa degë janë raportuar vonesa dhe tensione.

Kandidatët në garë

Në këtë proces u regjistruan rreth 280 kandidatë, mes tyre figura të njohura të PD-së dhe emra me të shkuar në drejtësi.

• Në Durrës dhe Dibër, kandiduan Arjan Ndoja (ish-prokuror, i shkarkuar nga Vettingu) dhe Xhemal Gjunkshi, i përfshirë në çështjen “Partizani”.

• Në Tiranë, gara është e fortë mes Ilir Alimehmetit, Ilda Zhulalit, Dorian Telitit, Alba Kepit dhe Jonathan Panos.

Pritet që procesi i numërimit dhe shpallja e fituesve të sjellë zhvillime të reja në kampin opozitar.