Gjykata e Apelit në Londër ka refuzuar kërkesën për të apeluar vendimin e ekstradimit të Edmond Haxhisë dhe katër shtetasve britanikë, të akuzuar për përfshirje në vrasjen e biznesmenit Ardian Nikulaj. Vendimi është marrë më 25 shkurt nga gjykatësi Sir Peter Lane, i cili pranoi argumentet e Ministrisë së Drejtësisë shqiptare, përfaqësuar nga një prokuror britanik, duke mos pranuar aplikimin për apelimin e ekstradimit.

Haxhia, Thomas Mithan, Harry Simpson, Harriet Bridgeman dhe Steven Hunt kishin tentuar të rrëzonin vendimin e Gjykatës së Ekstradimeve “City of Westminster Magistrate Court” të datës 27 gusht 2023, ku kërkesa e drejtësisë shqiptare për ekstradimin e tyre ishte pranuar.

Ky vendim hap rrugën për ekstradimin e grupit në Shqipëri, ku ata do të përballen me akuzat për vrasjen e Ardian Nikulaj, e kryer nga portugezi Ruben Saraiva në Shëngjin më 19 prill 2023. Sipas Prokurorisë së Lezhës, Edmond Haxhia është akuzuar si truri i organizatës, ndërsa katër shtetasit britanikë ishin përgjegjës për mbikëqyrjen e viktimës dhe përcjelljen e informacioneve ekzekutorit.

Ky është i dyti rast i ekstradimit të një shtetasi britanik në Shqipëri, pas rastit të vitit 2007, kur britanikët Dino Christodoulou dhe Robin Arnold u ekstraduan dhe u dënuan për abuzime me fëmijët.