Aktori i njohur amerikan, Jesse Eisenberg, ka marrë nënshtetësinë polake në një ceremoni të veçantë, për nder të kontributit të tij në prezantimin e historisë së hebrejve gjatë Luftës së Dytë Botërore në filmin “A Real Pain”, fitues i çmimit Oscar. Eisenberg, i njohur për rolet e tij në kinematografi, shkroi, drejtoi dhe luajti në këtë film për dy kushërinj amerikanë që udhëtojnë në Poloni për të nderuar gjyshen e tyre, një e mbijetuar e Holokaustit.

Filmi, i cili është frymëzuar nga historia e familjes së Eisenberg, është një portret i pasionuar i mbijetesës dhe kujtimit të Holokaustit. Eisenberg u frymëzua të realizonte këtë histori pas vdekjes së tezes së tij të madhe, Doris, në vitin 2019, një grua që ishte rritur në Poloni dhe kishte shpëtuar nga Holokausti.

Gjatë ceremonisë së ndarjes së nënshtetësisë, Eisenberg tha: “Ndërsa po filmonim në Poloni, dhe po ecja rrugëve, fillova të ndihesha shumë më rehat në këtë vend, ishe kaq e natyrshme lidhja, ndoshta sepse familja ime kishte jetuar në këtë vend për shumë më gjatë sesa në Nju Jork.”

Presidenti Andrzej Duda shprehu kënaqësinë që shumë individë, përfshirë Eisenberg, i njohin dhe respektojnë trashëgiminë e tyre polake dhe dëshirojnë të krijojnë një lidhje më të fortë me vendin. Ai theksoi se ky akt nderimi është një dëshmi e vlerës së trashëgimisë kulturore dhe historike të Polonisë.

Eisenberg u nominua për një Oscar për shkrimin e filmit, ndërkohë që Kieran Culkin fitoi çmimin për aktorin më të mirë jo protagonist.