Presidenti rus, Vladimir Putin, ka reaguar një ditë pas deklaratave të presidentit francez, Emmanuel Macron, i cili e cilësoi Rusinë si një kërcënim për Evropën dhe sugjeroi mundësinë e vendosjes së disa shteteve evropiane nën mbrojtjen bërthamore të Francës.

Në komentet e tij, Putin ironizoi idenë e Macronit duke përmendur dështimin e Napoleonit në fushatën e tij kundër Rusisë në vitin 1812.

“Ende ka njerëz që duan të kthehen në kohën e Napoleonit, duke harruar si përfundoi,” tha Putin, pa e përmendur drejtpërdrejt emrin e presidentit francez.

Gjatë fjalës së tij, Putin theksoi gjithashtu se Rusia do të zgjedhë një paqe që i garanton siguri afatgjatë.

“Duhet të zgjedhim një paqe që na përshtatet dhe që do të sigurojë stabilitetin afatgjatë të vendit tonë,” deklaroi ai.

I pyetur nga një nënë e një ushtari të rënë nëse Rusia do të tërhiqet nga konflikti në Ukrainë, ai u përgjigj shkurt: “Nuk do të tërhiqemi.”

Ndërkohë, Ministria e Jashtme ruse ka kundërshtuar idenë e një armëpushimi njëmujor dhe vendosjen e forcave paqeruajtëse evropiane në Ukrainë. Zëdhënësja Maria Zakharova deklaroi se çdo ndërprerje e përkohshme e luftimeve është e papranueshme pa një marrëveshje përfundimtare.