Ish-deputeti i Partisë Socialiste, Andis Harasani, ka ndërruar jetë në moshën 54-vjeçare pas një beteje të gjatë me kancerin. Lajmi u shpërnda nga bashkëshortja e tij, Suela Harasani, e cila shprehu dhimbjen dhe humbjen e madhe përmes një postimi emocionues në rrjetet sociale.

Suela Harasani ka ndarë një mesazh për miqtë dhe familjarët, duke theksuar se Andis luftoi për jetën me gjithë forcën, besimin dhe vendosmërinë që e karakterizonin gjithmonë. Ajo shtoi se ai e humbi betejën me kancerin, por do të mbetet përjetësisht në zemrat e saj dhe të dy fëmijëve, Thea dhe Henry.

“Ti do mbetesh në zemrat tona njeriu yne më i shtrenjtë, me humor të pakrahasueshëm, gjithë mençuri e guxim për të ecur përpara. Do na mungosh pafundësisht, dashuria jonë!” – shkruan ajo.

Andis Harasani ka qenë një figurë e njohur në jetën politike dhe profesionale shqiptare, i njohur për angazhimin e tij si deputet i PS-së dhe për kontributin në sektorin e energjisë. Ndarja e tij nga jeta ka lënë një boshllëk të madh te të dashurit e tij dhe komuniteti. Detajet e ceremonisë së lamtumirës do të bëhen të ditura në ditët në vazhdim.