Nju Jork – Shtetet e Bashkuara të Amerikës kanë kërkuar rishqyrtimin dhe mbylljen graduale të Misionit të Kombeve të Bashkuara në Kosovë (UNMIK), duke e cilësuar atë si një strukturë të tejkaluar që nuk i shërben më paqes apo qeverisjes në vend.

Gjatë një mbledhjeje të Këshillit të Sigurimit të OKB-së, përfaqësuesi amerikan John Kelley deklaroi se 81 për qind e buxhetit të UNMIK-ut shpenzohet për paga të stafit, ndërkohë që misioni, sipas tij, ka humbur çdo funksion të dobishëm për realitetin aktual të Kosovës.

“UNMIK është një mision paqeruajtës pa paqeruajtës, me një mandat të tejkaluar prej kohësh. SHBA u bën thirrje anëtarëve të tjerë të Këshillit që të rishqyrtojnë mandatin e UNMIK-ut dhe të fillojnë një mbyllje të rregullt të operacioneve të tij. Koha për këtë tranzicion ka kaluar,” u shpreh Kelley.

Ai theksoi se UNMIK nuk ka më asnjë rol në qeverisjen e Kosovës dhe është bërë një strukturë e stërngarkuar dhe e tejfinancuar. Në këtë kontekst, SHBA rekomandoi që takimet e ardhshme të Këshillit të Sigurimit mbi UNMIK-un të zhvillohen në format të mbyllur, duke reduktuar gjithashtu frekuencën e tyre në vetëm një herë në vit, për shkak të ngarkesës së agjendës globale.

Normalizimi Kosovë–Serbi, përparësi e SHBA

Në fjalën e tij, Kelley shtoi se normalizimi i marrëdhënieve mes Kosovës dhe Serbisë është qenësor për stabilitetin në Ballkanin Perëndimor. Ai bëri thirrje për përmbajtje nga retorikat eskaluese dhe theksoi se njohja e ndërsjellë duhet të jetë qëllimi përfundimtar i procesit të dialogut.

“Kosova dhe Serbia duhet të punojnë në zbutje të tensioneve, të përmbahen nga retorikat eskaluese mes tyre dhe në rajonin e tyre për një të ardhme më prosperuese. Amerika dhe komuniteti global janë më të sigurta kur vendet i zgjidhin konfliktet mes tyre në mënyrë paqësore,” tha Kelley.

Ky qëndrim i SHBA vjen në një kohë kur roli i UNMIK-ut është vënë shpesh në pikëpyetje nga autoritetet në Prishtinë dhe diplomacia perëndimore, duke reflektuar realitetin e ri politik dhe institucional në Kosovë.