Mysteri i vrasjes së shqiptarit Alban Gropçaj, 28 vjeç, në Fortaleza të Brazilit, ka marrë sërish vëmendje në median italiane, teksa programi investigativ “Le Iene” në Italia 1 i është rikthyer çështjes me pyetjen domethënëse: “Kush e vrau Albanin?”
Ngjarja ka ndodhur në shkurt të vitit 2019, dhe pas pesë vitesh, më 5 maj 2025, do të zhvillohet seanca e parë gjyqësore në Brazil. Guido Bertola, një biznesmen italian, është i akuzuar për organizimin e vrasjes në bashkëpunim me të dashurën e tij braziliane.
Çfarë ndodhi në Brazil?
Sipas versionit të biznesmenit italian, ai dhe shqiptari Alban Gropçaj kishin udhëtuar së bashku në Brazil për çështje biznesi, pasi i riu punonte në kompaninë e tij në Itali. Një mbrëmje, teksa po ktheheshin në banesë, u ndaluan nga dy persona me motor. Sipas Bertolës, autorët nxorën atë nga makina dhe më pas qëlluan Albanin me një plumb, duke e lënë të vdekur.
Por për gazetarin Luigi Pelazza dhe ekipin e “Le Iene”, kjo histori ka shumë përplasje logjike dhe pikëpyetje të hapura.
Pista e pagesës për vrasje
Hetimet braziliane janë ndriçuar më tej nga dëshmia e vëllait të të dashurës së Bertolës, i cili i ka thënë policisë se i kishte dorëzuar një zarf me para një të afërmi të tyre pak ditë para vrasjes. Ky person më vonë është ekzekutuar në rrethana të dyshimta, duke e lënë pistën e pagesës për vrasje të hapur.
Bertola mohon çdo akuzë
I lirë në Itali, Bertola ka folur për mediat në prani të avokatit të tij, ku mohoi çdo përfshirje në vrasje:
“Albanin e trajtonim si pjesë të familjes. Të gjithë e donin. Nuk e di kush e vrau.”
Por sipas “Le Iene”, një motive i mundshëm për vrasjen lidhet me kundërshtimin e Albanit ndaj lidhjes jashtëmartesore të Bertolës me gruan braziliane, çka mund të ketë sjellë tension dhe përplasje mes tyre.
Çështja mbetet e hapur, ndërsa sytë janë tani tek drejtësia braziliane, që më 5 maj do të nisë procesin ndaj Bertolës. Familja shqiptare e viktimës kërkon të vërtetën dhe drejtësi për Albanin – një i ri që iku në mënyrë të mistershme dhe ende të paqartë, në një kontinent larg shtëpisë.
