Gjykata e Korçës ka vendosur masën e sigurisë “Arrest me burg” për Andi Shkulakun, i cili u arrestua tre ditë më parë me urdhër të Prokurorisë së Korçës, nën akuzën për moskallëzim krimi në lidhje me vrasjen e Egli Progës më 10 gusht 2024.

Arrestimi i Shkulakut vjen pas një dëshmie të re të administruar nga prokuroria, ku thuhet se viktima fillimisht është dhunuar brenda ambienteve të një lokali nga shtetasi Leonidha Guçe, e më pas është goditur jashtë nga Denis Meçe. Ky detaj i ri pritet të ketë ndikim të drejtpërdrejtë në rrjedhën e hetimeve, duke rënduar pozitën e Guçes.

Sipas hetimeve, Andi Shkulaku ka qenë i pranishëm në vendngjarje dhe është larguar pa njoftuar autoritetet, duke fshehur informacion kyç për zbardhjen e krimit. Pavarësisht se pak ditë më parë prokuroria kishte përfunduar hetimet dhe kishte çuar dosjen për gjykim, dëshmia e fundit e ka detyruar hapjen e një dosjeje të re, e cila pritet të bashkohet me atë ekzistuese.

Nga dosja aktuale, Denis Meçe përballet me akuzën për vrasje me dashje, ndërsa Leonidha Guçe, Voltan Shkulaku dhe Arjan Manellari janë akuzuar për veprime që pengojnë zbulimin e së vërtetës. Me zhvillimet e fundit, hetimet pritet të marrin një drejtim të ri dhe të përfshijnë edhe elementë të tjerë që mund të kenë qenë të pranishëm në ngjarje.