Sektori detar shqiptar pritet të hyjë në një fazë të re zhvillimi strategjik. Ministrja Belinda Balluku deklaroi sot se infrastruktura portuale e vendit ka kaluar nga një gjendje mirëmbajtjeje minimale në një transformim tërësor në dhjetëvjeçarin e fundit.

Sipas saj, një ndër sfidat më të mëdha për sektorin detar ka qenë mungesa e dixhitalizimit dhe ndarja jo e qartë funksionale e porteve, problematika të cilat tashmë janë pjesë e një strategjie të re kombëtare që synon modernizimin dhe integrimin e Shqipërisë në rrjetet ndërkombëtare të transportit detar.

“Një ndër shtyllat më të rëndësishme është dixhitalizimi i plotë i gjithë trafikut detar, si dhe garantimi i sigurisë detare në përputhje me standardet ndërkombëtare,” u shpreh Balluku.
Ajo shtoi se vetëm në 10 vitet e fundit, Shqipëria ka regjistruar 8.5 milionë pasagjerë nëpërmjet porteve të saj, duke theksuar se ky fluks i shtuar kërkon një infrastrukturë shumë më moderne dhe të sigurt.

Ministrja njoftoi gjithashtu për një zhvillim madhor: në prag të nisjes është një kantier i fuqishëm ndërtimi, vetëm pak milje larg qytetit të Durrësit, në një zonë industriale të përzgjedhur posaçërisht.
Porti i ri pritet të ketë një thellësi nga 13 deri në 16 metra, çka do të mundësojë akomodimin e anijeve të mëdha dhe do të shumëfishojë kapacitetet e industrisë detare shqiptare.

“Ky projekt do të sjellë një revolucion të vërtetë për ekonominë blu të vendit tonë,” përfundoi Balluku.