Kryesocialisti Edi Rama, në një takim me gratë dhe vajzat në Vlorë, theksoi rëndësinë e reformës në drejtësi dhe rolin historik të Partisë Socialiste në këtë transformim. Rama deklaroi se anëtarësimi i Shqipërisë në Bashkimin Europian është e vetmja garanci për të mos cenuar barazinë përpara ligjit.

“Shqipëria sot nuk është ajo që ishte. Drejtësia në Shqipëri nuk është më ajo që ishte. Altin Dumani dhe të tjerë që janë sot pjesë e drejtësisë së re, më parë ishin të çarmatosur. Sot drejtësia është e armatosur me një shpate që ia dha Partia Socialiste falë mbështetjes së qytetarëve,” tha Rama.

Ai nënvizoi se vota për PS më 11 maj është një takim me historinë:
“Ju them të gjithëve, nëse doni t’u jepni fëmijëve atë që prindërit tanë nuk na e dhanë dot, duhet të jepni votën për pasaportën europiane. Në 11 maj, Shqipëria shkon në një takim historik.”

Duke folur për Vlorën, Rama tha se qyteti është bërë shembull për shumë zona të tjera të vendit, por pranoi se ka ende punë për të bërë:
“Vlora nuk është vetëm Lungomare apo bulevardi. Ka akoma zona ku ndryshimi nuk ka mbërritur, por bindja ime është që Vlora duhet të japë një shembull më 11 maj.”

Në fund, kryesocialisti u bëri thirrje qytetarëve, veçanërisht burrave dhe djemve të Vlorës, që të dalin masivisht në votime:
“Nëse Vlora nuk thyen rekord në këto zgjedhje, do jetë turpi i gjithë atyre burrave që nuk shkojnë në votime.”