Ish-presidenti dhe aktualisht kandidati republikan në detyrë, Donald Trump, ka mohuar se po shqyrton mundësinë e kandidimit për një mandat të tretë në Shtëpinë e Bardhë, një veprim që ndalohet qartazi nga Kushtetuta e Shteteve të Bashkuara.

Në një intervistë të regjistruar për emisionin “Meet the Press” në NBC, Trump tha:
“Do të jem një president tetëvjeçar, do të jem një president dy-mandatesh. Gjithmonë kam menduar se kjo ishte shumë e rëndësishme.”

Deklaratat e Trump vijnë pas spekulimeve të shtuara që lidhen me komentet e mëparshme të tij, ku kishte sugjeruar në mënyrë provokuese se mund të kërkonte një mandat të tretë apo edhe të katërt. Ai më pas e cilësoi atë deklaratë si një mënyrë për të tallur mediat, të cilat i ka quajtur në mënyrë të përsëritur “të rreme”.

Ndërkohë, The Trump Organization ka nxjerrë në shitje kapele me mbishkrimin “Trump 2028”, gjë që ka shtuar thashethemet se ish-presidenti mund të synojë të qëndrojë në skenën politike edhe pas vitit 2029.

Trump, gjatë intervistës nga rezidenca e tij në Florida, pranoi se “shumë njerëz po kërkojnë që ai të qëndrojë”, por theksoi se një mandat i tretë nuk është pjesë e planeve të tij.
“Për aq sa di unë, nuk lejohet të bëhet kjo. Nuk e di nëse është çështje kushtetuese apo jo, por kjo nuk është diçka që dua të bëj,” u shpreh ai.

Ai përmendi disa figura republikane që, sipas tij, do të mund ta pasonin, përfshirë nënkryetarin JD Vance dhe sekretarin e Shtetit, Marco Rubio.

Sipas Amendamentit të 22-të të Kushtetutës së SHBA-së, një president mund të shërbejë maksimumi dy mandate katërvjeçare, çka e bën ligjërisht të pamundur një mandat të tretë, pavarësisht mbështetjes nga baza republikane apo spekulimeve të vazhdueshme.