Një incident fizik është shënuar në zonën e “Rrethrrotullimit të Mirasit” në qarkun e Korçës, ku është përfshirë kandidati për deputet i Partisë Demokratike, Bledjon Nallbati, së bashku me vëllain e tij, Altin Nallbati.

Sipas burimeve lokale, ngjarja ndodhi pasi një kamion që po udhëtonte transit në territorin shqiptar u ndalua në rrugë, pasi një fuoristradë e zezë i preu rrugën duke i dalë përpara. Nga mjeti zbritën dy persona, të cilët më pas u identifikuan si Bledjon dhe Altin Nallbati, të cilët kërkuan llogari drejtuesit të kamionit për, siç pretendohet, rrezikim gjatë qarkullimit.

Sipas dëshmive paraprake, debati verbal është përshkallëzuar në tentativë për dhunë fizike dhe përpjekje për të nxjerrë shoferin nga kabina. Ky i fundit ka rezistuar dhe ka refuzuar të zbresë nga mjeti.

Në vendngjarje mbërriti menjëherë një patrullë policie, e cila shoqëroi të tre personat e përfshirë në komisariatin e Devollit. Pas marrjes në pyetje, të tre janë lënë të lirë.

Burime nga policia thanë se sipas deklaratës së Altin Nallbatit, incidenti nisi pasi kamioni “po ecte me shpejtësi dhe rrezikoi përplasjen me mjetin që ai drejtonte”.

Ngjarja ka shkaktuar reagime të ndryshme në rrjetet sociale dhe ka sjellë vëmendje mbi sjelljen e figurave politike në publik, veçanërisht në një kohë kur klima politike është e tensionuar për shkak të afrimit të zgjedhjeve.