Në një kohë ku ritmi i jetës është gjithnjë e më i vrullshëm, shumë prej nesh gjenden shpesh të “ngecur” në biseda që zgjasin më shumë sesa duhet, humbasin kuptimin apo thjesht bëhen të lodhshme. Por si të largohemi me edukatë pa krijuar tension apo keqkuptime?

Ekspertët e komunikimit sugjerojnë se të dish të vendosësh kufij me mirësjellje është jo vetëm e pranueshme, por edhe e nevojshme. Konsulentja e njohur spanjolle e komunikimit, Aurora Michavila, thekson se menaxhimi i kohës dhe energjisë personale nuk është egoizëm, por një formë vetërespekti.

“Sa herë që themi ‘jo’ ndaj një bisede që nuk na shërben më, i themi ‘po’ kohës sonë, qetësisë dhe prioriteteve personale”, shprehet Michavila.

Shumë njerëz hezitojnë të largohen nga një bisedë për shkak të presionit shoqëror ose ndjesisë së fajit, nga frika se mund të duken të pasjellshëm. Por ekspertët sugjerojnë disa fraza të thjeshta që mund të ndihmojnë për ta përmbyllur një bisedë në mënyrë të butë dhe të hijshme:

• “Më vjen mirë që folëm, por tani duhet të largohem – kam diçka tjetër për të bërë.”

• “Ishte shumë këndshëm të flisnim. Do shihemi së shpejti!”

• “Të falënderoj për këtë bisedë. Tani më duhet të merrem me disa gjëra.”

Po ashtu, edhe mënyra se si përcillet largimi ka rëndësi: një buzëqeshje, një shikim miqësor apo një lëvizje e natyrshme ndihmojnë për të ruajtur harmoninë. Një tjetër truk i dobishëm është të vendosësh kufi kohor që në fillim – fraza si “kam shumë pak kohë” përgatit bashkëbiseduesin dhe shmang situatat e sikletshme.

Në një botë ku koha është gjithnjë e më e çmuar, të dish të largohesh me edukatë është një aftësi që, sipas specialistëve, tregon jo mungesë respekti për tjetrin – por respekt për veten.