Emri i Xhisiela Malokut është rikthyer sërish në qendër të vëmendjes, pasi ajo është paraqitur për herë të dytë brenda një jave në ambientet e Prokurorisë së Posaçme (SPAK). E shoqëruar nga një vajzë tjetër, prania e saj në këtë institucion ka ngritur pikëpyetje të shumta mbi arsyen dhe cilësinë e dëshmisë së saj, ndërkohë që ende nuk ka informacion zyrtar nga SPAK lidhur me këtë zhvillim.

Maloku u bë e njohur për publikun vite më parë për shkak të lidhjes së saj me Rexhep Rrajën, djalin e ish-deputetit të PS, Rrahman Rraja, një histori që shkaktoi debat të madh në opinionin publik për shkak të akuzave për dhunë, presione dhe ndërhyrje në drejtësi.

Pavarësisht mungesës së detajeve konkrete rreth paraqitjes së saj në SPAK, fakti që Maloku është thirrur dy herë brenda pak ditësh, shton interesin për një hetim të mundshëm që mund të përfshijë figura politike të njohura apo ngjarje të së kaluarës që po rihetohen.

Në të njëjtën ditë, në SPAK është paraqitur për deklarim edhe Ajola Xoxa, bashkëshortja e kryebashkiakut të Tiranës, Erion Veliaj, duke e bërë ditën e sotme të mbushur me zhvillime të rëndësishme në sferën e hetimeve të posaçme.