Kandidati për deputet i forcës politike “Shqipëria Bëhet” të Adriatik Lapajt, Ergys Isufi, është lënë i lirë pas arrestimit të tij një ditë më parë për drogë. Ai u ndalua nga policia në një kontroll rutinë, ku iu gjet një sasi e vogël kokainë. Për shkak të sasisë të vogël të drogës, Prokuroria e Sarandës vendosi ta procedojë atë në gjendje të lirë, ndërsa Isufi dyshohet të jetë përdorues i drogës, por rezulton pa precedent penal.

Për këtë ngjarje të rëndë, Adriatik Lapaj, drejtuesi i Nismës “Shqipëria Bëhet”, njoftoi se Ergys Isufi do të largohet nga lista e kandidatëve për zgjedhjet parlamentare dhe nuk do të jetë më pjesë e koalicionit të tij.

Isufi, i cili ka jetuar për disa vite në Suedi, u ndalua teksa udhëtonte me një tjetër person nga Saranda drejt Borshit. Kontrolli i ushtruar në banesën e tij nuk nxori asgjë të jashtëligjshme.