Toronto – Artistja shqiptare që jeton dhe vepron në Kanada, Rinesance, ka ndarë me publikun një rrëfim tronditës dhe prekës: ajo është diagnostikuar me tumor në tru dhe ka kaluar tashmë dy ndërhyrje kirurgjikale.

Përmes një mesazhi të ndjerë në rrjete sociale, këngëtarja tregoi se është në një qendër rehabilitimi dhe së shpejti do të nisë terapinë radiologjike, e cila pritet të zgjasë për disa javë. Edhe pse përballë një sfide të rëndë shëndetësore, ajo mbetet e fortë dhe e motivuar.

“Tash jom në qendër rehabilitimi e shpejt kom me fillu terapinë radiologjike, që pritet me zgjatë disa javë… Mënyra se qysh ka rrjedhë gjithçka është bekim në vete për mua edhe po e shoh si motiv për me e kalu edhe këtë sfidë e me iu kthy muzikës qashtu qysh di unë”, shkroi artistja.

Rinesance njihet për vokalin e veçantë dhe stilin e saj unik, duke ndërtuar një karrierë të suksesshme mes skenës shqiptare dhe asaj ndërkombëtare. Lajmi për përballjen e saj me tumorin vjen vetëm pak ditë pas publikimit të një bashkëpunimi me reperin Buta, duke e bërë goditjen edhe më të papritur për fansat.

Shumë ndjekës dhe kolegë nga industria muzikore i kanë shprehur mbështetje dhe urime për shërim të shpejtë, ndërsa komuniteti artistik shqiptar është bashkuar në lutje për forcën dhe rikuperimin e saj të plotë.