Berlin – Me tone të ashpra dhe fjalë të qarta, Presidenti Federal i Gjermanisë, Frank-Walter Steinmeier, hodhi poshtë çdo përpjekje për të barazuar luftën e Rusisë kundër Ukrainës me luftën kundër fashizmit gjatë Luftës së Dytë Botërore. Në një fjalim përkujtimor në Bundestag, me rastin e 80-vjetorit të përfundimit të luftës, ai e cilësoi narrativën ruse si një “gënjeshtër historike”.

“Lufta e agresionit e Putinit, fushata e tij kundër një vendi të lirë dhe demokratik, nuk ka asgjë të përbashkët me luftën kundër tiranisë nacionalsocialiste,” deklaroi Steinmeier. Ai e quajti këtë përpjekje të Moskës një “maskim për çmendurinë perandorake, padrejtësinë e rëndë dhe krimet më të rënda”.

Fjalimi i Presidentit gjerman, i mbajtur në një atmosferë solemniteti të thellë në parlamentin gjerman, nuk kurseu as Shtetet e Bashkuara të Amerikës, veçanërisht gjatë presidencës së Donald Trump. Steinmeier shprehu shqetësimin e tij për atë që e quajti “shkatërrimi i vlerave” nga ana e SHBA-së, një vend që historikisht ka qenë shtylla e rendit ndërkombëtar pas luftës.

“Fakti që Shtetet e Bashkuara, nga të gjitha vendet, po i kthejnë shpinën rendit ndërkombëtar të bazuar në të drejtën ndërkombëtare, është një tronditje me përmasa të reja,” u shpreh ai. Steinmeier nuk u ndal me kaq. Ai paralajmëroi për rreziqet që i kanosen edhe demokracive më të konsoliduara: “E shohim me tmerr se edhe demokracia më e vjetër në botë mund të rrezikohet shpejt nëse shpërfillet sistemi gjyqësor, minohet ndarja e pushteteve dhe sulmohet liria akademike.”

Presidenti gjerman u ndal edhe tek pasojat e këtyre zhvillimeve për Evropën dhe Gjermaninë. Ai ngriti alarmin për rritjen e “magjepsjes me autoritarizmin dhe tundimeve populiste”, ndërsa theksoi se “forcat ekstremiste” po helmojnë debatin publik dhe po luajnë me frikërat e qytetarëve për t’i përçarë.

Në kontekstin e përkujtimit të Luftës së Dytë Botërore, Steinmeier kritikoi ashpër përpjekjet për të relativizuar të kaluarën naziste. “Habitem kur disa e diskreditojnë kujtesën si një kult faji,” tha ai, me një referencë të dukshme ndaj partisë së djathtë ekstreme AfD. Ai paralajmëroi se “kërkesat për të vënë një vijë ndarëse nën historinë dhe përgjegjësinë tonë janë të rrezikshme për shoqërinë dhe për identitetin demokratik të Gjermanisë.”

Me këtë fjalim, Steinmeier jo vetëm përkujtoi viktimat e së kaluarës, por edhe dha një sinjal të qartë politik për të tashmen: kundërshtimi i qartë ndaj agresionit, revizionizmit historik dhe kërcënimeve ndaj demokracisë është detyrë e përhershme.