Avokatja e caktuar nga shteti, Aurora Guska, ka zbardhur detaje tronditëse nga dinamika e ngjarjes që çoi në vrasjen e 34-vjeçarit Reshit Sallahu, pas një konflikti të egër mes dy familjeve fqinje për çështje prone.

Sipas Guskës, konflikti ka nisur kur familja e viktimës ka tentuar të bllokojë rrugën që çonte në shtëpinë e babait të autorit, Ylber Jaku. Situata është përshkallëzuar kur motra e viktimës ka dhunuar me sopatë prindërit e Jakut, duke shkaktuar një përplasje të dhunshme.

Avokatja sqaron se babai i autorit, Agim Jaku, i trembur nga eskalimi i situatës, ka telefonuar të birin dhe i ka thënë që ndodhej në spital për shkak të një “aksidenti”, me shpresën për të shmangur përplasjen. Ylber Jaku, i cili ndodhej në Has dhe punonte në ndërtim, jo në Angli siç është raportuar më herët, ka ardhur menjëherë drejt spitalit.

“Kur ka parë prindërit, sidomos nënën në gjendje të rëndë, ka pësuar një tronditje të fortë psikologjike dhe ka fikur telefonin,” – tha avokatja Guska.

Ajo theksoi se babai i autorit ka kontaktuar disa herë policinë, duke e paralajmëruar për gjendjen e djalit dhe mundësinë e një ngjarjeje kriminale. “Kam të gjitha telefonatat dhe mesazhet nga ora 09:49 deri në 11:13, ku Agim Jaku i kërkon policisë të ndërhyjë, sepse djali i tij kishte dalë jashtë kontrollit,” – deklaroi ajo.

Ngjarja tragjike duket se ishte një rezultat i paralajmëruar, për të cilin familja e autorit kishte sinjalizuar, por pa një reagim efektiv nga autoritetet.