Kryeministri Edi Rama zhvilloi sot një takim zyrtar me Sekretarin e Përgjithshëm të NATO-s, Mark Rutte, i cili ndodhet për një vizitë në Shqipëri.

Përmes një postimi në rrjetet sociale, kreu i qeverisë shqiptare e cilësoi takimin si një moment të rëndësishëm për të thelluar bashkëpunimin me Aleancën Veriatlantike.

“Kënaqësi të mirëpres Sekretarin e Përgjithshëm të NATO-s, Mark Rutte, me të cilin diskutuam mbi forcimin e mëtejshëm të rolit të Shqipërisë në Aleancë, sfidat e sigurisë në rajon dhe kontributin tonë aktiv në NATO,” deklaroi Rama.

Vizita e Rutte vjen në një kohë kur rajoni i Ballkanit përballet me sfida të shumta në aspektin e sigurisë dhe gjeopolitikës, ndërsa Shqipëria vijon të rrisë rolin e saj aktiv brenda strukturave të Aleancës. Pritet që në agjendën e takimit të jenë përfshirë edhe zhvillimet në Ukrainë, përgatitjet për Samitin e ardhshëm të NATO-s, si dhe projektet për rritjen e kapaciteteve ushtarake në vend.