Një ngjarje e pazakontë dhe e rëndë ka ndodhur sot në Lubjanë, ku Andrej Hoivik, deputet dhe përfaqësues i Partisë Demokratike Sllovene (SDS) në opozitë, është ngjitur në kulmin e ndërtesës së parlamentit dhe ka kërcënuar se do të hidhej nga çatia, sipas raportimeve të mediave ndërkombëtare.

Ngjarja alarmoi autoritetet, dhe në vendngjarje mbërritën policia, zjarrfikësit dhe ambulanca. Zjarrfikësit ngritën një shkallë drejt kulmit dhe pas negociatave, Hoivik pranoi të zbriste, duke iu dorëzuar personelit mjekësor pa lëndime.

Në një deklaratë për mediat, Hoivik tha:

“Nuk akuzoj askënd, madje as kryeministrin Robert Golob. Por ajo që po bëjnë në këtë vend, nuk është e drejtë.”

Policia ka konfirmuar se nuk ka pasur të lënduar, ndërsa ngjarja po trajtohet si një rast i krizës psikologjike, ku autoritetet po ofrojnë ndihmën e nevojshme. Sipas burimeve të brendshme, Hoivik kishte shfaqur shenja rraskapitjeje emocionale gjatë javëve të fundit, ndërsa motivet e sakta nuk janë bërë ende publike.

Partia Demokratike Sllovene reagoi përmes një postimi në rrjetet sociale:

“Sprovat e jetës ndonjëherë janë shumë të vështira dhe kërkojnë mirëkuptim.”

Ngjarja ka tronditur opinionin publik në Slloveni dhe ka rindezur diskutimet mbi shëndetin mendor dhe presionin psikologjik në jetën politike. Autoritetet pritet të japin një njoftim zyrtar në orët në vijim.