Gazetari suedez Joachim Medin, i arrestuar në Turqi më 27 mars dhe i dënuar për “fyerje të Presidentit turk” Recep Tayyip Erdogan, u lirua sot, njoftoi kryeministri suedez Ulf Kristersson. Medin është nisur drejt Suedisë dhe pritet të mbërrijë brenda pak orësh, sipas deklaratës së Kristersson në rrjetin social X.
“Puna e vazhdueshme, në qetësi relative, ka dhënë fryte,” shkroi kryeministri suedez, duke falënderuar homologët evropianë për mbështetjen në procesin e lirimit.
Medin, 40 vjeç, punon për gazetën suedeze Dagens ETC dhe u arrestua gjatë mbulimit të protestave në Stamboll pas arrestimit të kryebashkiakut Ekrem Imamoglu. Në fund të prillit, ai u dënuar me 11 muaj burg me kusht për “fyerje të presidentit”, por vazhdoi të mbahej në burg për shkak të akuzave për “pjesëmarrje në organizatë terroriste”.
Gazetari ka mohuar të gjitha akuzat dhe sipas autoriteteve turke, ai u ndjek penalisht pasi dyshohet se mori pjesë në një protestë të Partisë së Punëtorëve të Kurdistanit në Stokholm në janar 2023. Lirimi i tij shënon një moment të rëndësishëm në marrëdhëniet mes Suedisë dhe Turqisë.
