Presidenti francez Emmanuel Macron, nga Forumi Ekonomik Ndërkombëtar që po zhvillohet në Tiranë, bëri një thirrje të fortë për krijimin e një tregu të përbashkët europian në tri sektorë strategjikë: financë, energji dhe telekomunikacion, duke theksuar se kjo është thelbësore për të ardhmen ekonomike dhe strategjike të Europës.

“Ne duhet të krijojmë një treg të përbashkët në këto sektorë, sepse na duhen më shumë kapacitete që të investojmë. uKemi më tepër kursime se Kina, por këto kursime nuk investohen në kapital dhe inovacion,” – deklaroi Macron.

Ai vuri në dukje se Europa ka potencial financiar më të madh se Kina, por jo të njëjtën efikasitet në përdorimin e burimeve për rritje ekonomike dhe zhvillim teknologjik. Sipas tij, krijimi i një tregu të integruar në këto fusha do të përmirësonte ndjeshëm efikasitetin, konkurrueshmërinë dhe qëndrueshmërinë e bllokut europian.

Macron theksoi gjithashtu nevojën e investimeve të mëdha në siguri, mbrojtje, teknologji të gjelbër dhe inteligjencë artificiale (AI), duke i cilësuar si fusha kyçe për ruajtjen e sovranitetit europian dhe për përballjen me sfidat globale.

“Këto tre fusha do të kërkojnë më shumë investime, ndaj na duhet një riformësim i buxhetit të përbashkët,” – tha ai, duke vënë në dukje domosdoshmërinë e një qasjeje të re dhe më ambicioze nga Bashkimi Europian.

Në përfundim të fjalës së tij, Presidenti francez i bëri thirrje liderëve europianë të tregohen të guximshëm dhe largpamës në ndërtimin e aleancave dhe politikave të së ardhmes.

“Pyetja është: a do të bëhemi një fuqi e gjelbër, e aftë të mbrojë veten? Përgjigja është po.”

Macron përçoi një mesazh optimist dhe vendosmërie, duke e quajtur këtë një “moment të së vërtetës për kontinentin”, ku vendimet e sotme do të përcaktojnë vendin e Europës në botën e së nesërmes.