TIRANË – Gjatë konferencës së përbashkët me kryeministrin Edi Rama, presidenti francez Emmanuel Macron foli gjerësisht për përpjekjet e fundit për paqen në Ukrainë, duke theksuar se propozimi për armëpushim është një nismë amerikane dhe duhet respektuar.

“Presidenti amerikan erdhi me një ambicie për të bërë paqe. Ishte një deklaratë e rëndësishme dhe SHBA duhet të respektohet për këtë. Ne reaguam duke thënë se duhet një paqe e fortë dhe e qëndrueshme. Për këtë kemi bërë një punë shumë intensive,” deklaroi Macron.

Ai tha se gjatë një vizite në Kiev bashkë me Merz dhe Strmer, kishin komunikuar me Donald Trump, duke i përcjellë mbështetjen e tyre për armëpushimin me garanci sigurie për Ukrainën dhe nevojën për presion ndërkombëtar ndaj Rusisë.

“Në Kiev ishim me Strmer dhe Merz dhe thirrëm zotin Trump për t’i thënë se jemi të gjithë për armëpushim, me garanci sigurie. Trump dha një mbështetje të fortë. Pastaj, Putini propozoi një takim në Stamboll. Të dielën Zelensky dha pëlqimin, por sot nuk kemi asgjë konkrete,” sqaroi Macron.

Presidenti francez e cilësoi qëndrimin e Putinit si “cinik”, por shtoi se është i sigurt që Trump, i shqetësuar për besueshmërinë e Amerikës, do të reagojë.

“Propozimi për armëpushim dhe për të nisur negociatat është amerikan, është i rëndësishëm dhe nuk mund të ketë një përgjigje negative nga Rusia. Ne do të vazhdojmë të bashkëpunojmë që Ukraina të rezistojë dhe të ketë paqe të qëndrueshme,” theksoi Macron.

Dialogu Kosovë–Serbi

Në konferencë, Macron u ndal edhe tek dialogu Kosovë–Serbi, duke deklaruar:
“Udhërrëfyesi është i qartë! Shpresoj që bisedimet të rinisin javën e ardhshme,” tha ai, duke i bërë thirrje të dy palëve për angazhim të sinqertë dhe progres konkret në tryezën e bisedimeve.

Vizita e Macron në Tiranë u zhvillua në kuadër të Samitit të VI të Komunitetit Politik Europian dhe shënoi angazhimin e Francës në rajonin e Ballkanit për paqe, siguri dhe zhvillim të qëndrueshëm.