TIRANË – Në një atmosferë të ngarkuar politike, sot ka nisur numërimi i votave të mbërritura nga Greqia, i cili po zhvillohet në Parkun Olimpik në Tiranë. Procesi po ndiqet nga përfaqësues të të dyja palëve kryesore politike: Agron Gjekmarkaj nga Partia Demokratike, dhe Ulsi Manja e Taulant Balla nga Partia Socialiste.

Janë rreth 50 mijë vota me zarfe që kanë ardhur nga Greqia, të cilat janë kontestuar nga Partia Demokratike, duke kërkuar që të mos përfshihen në rezultatin përfundimtar deri në verifikimin e burimit të tyre.

Përfaqësuesi ligjor i PD-së në KQZ, Marash Logu, në një deklaratë për mediat tha se:

“Menjëherë sapo është zbardhur vendimi i Komisionerit Celibashi, kemi ushtruar ankim në KAS, duke kërkuar shfuqizimin dhe pezullimin e vendimit për numërimin e këtyre votave.”

Logu theksoi se komisionerët dhe numëruesit e PD-së në Parkun Olimpik po kontestojnë çdo votë që vjen nga Greqia, deri në provimin e origjinës së saj si votë e një zgjedhësi shqiptar.

“Kërkesa jonë është shumë e qartë: derisa të provohet se këto zarfe janë dërguar nga zgjedhës shqiptarë, do të kërkojmë që ato të mos përfshihen në rezultatin përfundimtar të zgjedhjeve.”

Ai nënvizoi gjithashtu se çdo votë e dyshimtë është shënuar në procesverbal dhe do të trajtohet në momentin kur dosja t’i dorëzohet Komisionerit për rezultatin final.

Nga ana tjetër, procesi i numërimit të votave nga vendet e tjera ka përfunduar, por mbetet i pezulluar vendimi për votat nga Greqia, i cili mund të ndikojë ndjeshëm në rezultatin përfundimtar, veçanërisht në qarqe me diferencë të ngushtë.

PD deklaron se nuk po kërkon të mohojë votën e emigrantëve, por të garantojë integritetin dhe transparencën e procesit, për të shmangur – siç u shpreh Logu – ndikimin e patronazhistëve të qeverisë në rezultatin zgjedhor.