MALIQ – Një ngjarje e rëndë është regjistruar ditën e djeshme në fshatin Sheqeras, ku dy adoleshentë, përkatësisht 14 dhe 15 vjeç, janë përfshirë në një konflikt fizik që ka përfunduar me plagosje me thikë.

Sipas policisë, 14-vjeçari ka goditur me mjet prerës bashkëmoshatarin e tij 15-vjeç, i cili aktualisht ndodhet në spital dhe është jashtë rrezikut për jetën.

Policia e Korçës njoftoi se ka nisur procedim penal ndaj autorit të ngjarjes, për veprën penale “Plagosje e lehtë me dashje”. Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

“Të miturit janë konfliktuar për motive të dobëta dhe nuk është hera e parë që kanë pasur përplasje mes tyre,” bëjnë me dije burime nga policia.

Ngjarja ka ngritur sërish shqetësimin për dhunën mes të rinjve dhe rrezikun që paraqet qarkullimi i mjeteve të rrezikshme në duart e të miturve. Autoritetet janë në ndjekje të çështjes dhe paralelisht po merren me sqarimin e rrethanave që çuan në këtë incident.