MALIQ – 15-vjeçari i plagosur me thikë nga një bashkëmoshatar i tij pas një konflikti për motive të dobëta ka rrëfyer për herë të parë momentet e sulmit dhe dinamikën e ngjarjes që tronditi komunitetin.

Në një intervistë , i mituri ka deklaruar se ndodhet drejt përmirësimit dhe ka marrë 3 goditje me thikë ditën e ngjarjes. Sipas tij, konflikti kishte nisur pas një postimi në rrjetet sociale, ndërsa përballja kishte degjeneruar në dhunë pas daljes nga shkolla.

“E kishte të paramenduar sulmin”

I mituri thekson se autori nuk ka vepruar në mënyrë spontane, por e kishte paramenduar sulmin me thikë, duke kujtuar edhe një tjetër rast një vit më parë, kur i njëjti person kishte plagosur me thikë tre bashkëmoshatarë gjatë një ndeshjeje futbolli.

“Unë jam mirë aktualisht dhe jam drejt përmirësimit. Kam marrë 3 goditje. Ai është një person agresiv prej familjes së tij sepse babai i tij është një person i alkoolizuar. Unë nuk e kam bullizuar asnjëherë autorin. Ai e kishte të paramenduar sulmin me thikë shumë kohë më parë.”

Fajëson ndikimin e familjes

15-vjeçari ka hedhur dritë mbi situatën familjare të autorit të dyshuar, duke theksuar se babai i tij ushtronte ndikim negativ dhe promovonte dhunën.

“Kam qenë vetë prezent kur babai i tij i tha që nëse ndonjë nga shokët e ofendon, ai duhet t’i godasë me thikë.”

Pavarësisht lëndimit fizik dhe traumës psikologjike, i mituri ka zgjedhur të falë autorin e sulmit.

“Pavarësisht gjithçkaje, unë e kam falur,” – tha ai në fund të rrëfimit.