Ky është Valmir Balliu nga fshati Slabinjë i Pogradecit, i cili ditën e djeshme tentoi të trafikojë drejt Greqisë një sasi prej 6 kilogramësh lëndë narkotike të dyshuar si heroinë, përmes pikës kufitare të Kapshticës.

Balliu dyshohet se është përdorur si korrier nga një grup kriminal që operon në zonën e Pogradecit dhe Korçës. Tentativa për trafikim është zbuluar nga strukturat e Agjencisë së Mbikëqyrjes Policore (AMP), të cilat kishin vënë në monitorim rastin dhe ndjekur lëvizjet e dyshimta.

Sipas burimeve zyrtare, Valmir Balliu nuk është kontrolluar nga punonjësit e policisë kufitare të Kapshticës, fakt që ka ngritur dyshime të forta për bashkëpunim të mundshëm ose shpërdorim detyre nga ana e efektivëve në këtë pikë kufitare.

Për këtë arsye, hetuesit e AMP-së kanë vendosur arrestimin e përgjegjësit të turnit dhe dy kontrollorëve të kufirit, të cilët po hetohen për veprën penale të “Shpërdorimit të detyrës”.

Ndërkohë, ndaj Balliut është ngritur akuza për “Trafikim të narkotikëve” mbetur në tentativë, ndërsa në fokus të hetimeve të Prokurorisë së Korçës janë tashmë edhe personat e tjerë që kanë bashkëpunuar me të në përpjekje për të kaluar lëndën narkotike jashtë vendit.

Balliut i është sekuestruar edhe aparatit celular, me shpresën e gjetjes së komunikimeve të tij me bashkëpunëtorët, që mund të ndihmojnë në zbardhjen e plotë të skemës së trafikimit.

Hetimet janë ende në vijim dhe pritet të ketë të tjera zhvillime në orët dhe ditët në vijim.