Autoritetet serbe kanë ndaluar në pikën kufitare Horgosh ish-pjesëtarin e Njësisë Speciale Operative të Policisë së Kosovës, Arbnor Spahiu, i cili aktualisht jeton në Gjermani dhe prej tre vitesh nuk është më pjesë e strukturave të sigurisë në Kosovë.

Lajmin e ka konfirmuar avokati i tij, Arianit Koci, i cili në një reagim në rrjetet sociale e ka quajtur ndalimin “të pajustifikuar dhe serioz”, duke theksuar se klienti i tij është marrë në pyetje lidhur me ngjarjet e 24 shtatorit 2023 në fshatin Banjska, kur një grup i armatosur serb sulmoi Policinë e Kosovës, ngjarje që u cilësua si sulm terrorist nga autoritetet në Prishtinë dhe partnerët ndërkombëtarë.

Spahiu është aktualisht i ndaluar në qendrën e paraburgimit në Kanjizë.

“Ky rast nuk është i izoluar. Po bëhet gjithnjë e më i qartë modeli i përgjigjes së Serbisë ndaj zhvillimeve në Kosovë. Ndalimi i Spahiut është i lidhur drejtpërdrejt me zhvillimet e fundit dhe me dënimin e Aleksandar Vllajiqit nga autoritetet e Kosovës për spiunazh në shërbim të BIA-s serbe,” – deklaroi avokati Koci.

Lidhja me rastin Vllajiq dhe përfshirja e BIA-s

Sipas Kocit, arrestimi i Spahiut mund të shihet si hakmarrje politike pas dënimit disa ditë më parë të shtetasit serb Aleksandar Vllajiq, i cili ka pranuar se ishte anëtar i Agjencisë serbe të Inteligjencës dhe Sigurisë (BIA) dhe kishte vepruar brenda territorit të Kosovës, duke infiltruar struktura të sigurisë.

“Pranimi i fajësisë nga Vllajiq ka vërtetuar zyrtarisht se BIA serbe ka operuar brenda Kosovës, gjë që mund të ketë shkaktuar reagime në Beograd,” u shpreh Koci.

Reagimet dhe heshtja institucionale

Radio Evropa e Lirë i është drejtuar Ministrisë së Punëve të Jashtme të Kosovës për koment lidhur me ndalimin e shtetasit kosovar, por deri në momentin e publikimit të lajmit, nuk ka marrë ndonjë përgjigje.

Ky nuk është rasti i parë që autoritetet serbe ndalojnë qytetarë të Kosovës në pikat kufitare, shpeshherë nën dyshime për krime lufte ose përfshirje në incidente të sigurisë. Qeveria e Kosovës i ka konsideruar këto ndalime si të pabazuara dhe me prapavijë politike, duke kërkuar lirimin e menjëhershëm të të ndaluarve.

Marrëveshja e vitit 2013, por pa zbatim në praktikë

Kosova dhe Serbia kishin arritur më 2013 një Marrëveshje për Ndihmë të Ndërsjellë Juridike, me ndërmjetësimin e Bashkimit Evropian, por bashkëpunimi në çështjet e ndjeshme, veçanërisht për rastet e krimeve të luftës apo të sigurisë, ka qenë minimal ose inekzistent.