Khaby Lame, influencuesi italo-senegalez dhe ylli më i njohur i TikTok në botë me 162.2 milionë ndjekës, u arrestua të premten më 6 qershor nga Shërbimi Federal i Imigracionit të SHBA-së (ICE) në Aeroportin Ndërkombëtar Harry Reid në Las Vegas, Nevada. Arsyetimi i arrestimit ishte skadimi i vizës së tij.

Sipas deklaratës së agjencisë federale, 25-vjeçari Cabane “Cabi” Lame kishte mbërritur në SHBA më 30 prill, por viza e tij kishte kaluar afatin e vlefshmërisë. Për këtë arsye, ai u arrestua për shkelje të ligjit të imigracionit.

Megjithatë, sipas ICE, Khaby Lame u lejua të largohej “vullnetarisht” më 6 qershor dhe që nga ajo kohë është larguar nga Shtetet e Bashkuara.

Khaby Lame, i njohur për videot e tij të shkurtra dhe pa fjalë në TikTok, ku ironizon dhe thjeshton situata komplekse me një gjest karakteristik, është bërë një figurë ndërkombëtare me famë të madhe. Ai ka shënuar një rritje të jashtëzakonshme të famës dhe pasurisë, falë videove që ka nisur të postojë gjatë pandemisë COVID-19, pas humbjes së punës në fabrikë në mars 2020 në Chivasso, afër Torinos.

Forbes e ka vlerësuar pasurinë e tij rreth 16.5 milionë dollarë, ndërkohë që është cilësuar si “Charlie Chaplin i epokës dixhitale”.

Përveç suksesit në rrjetet sociale, Khaby Lame është edhe ambasador i UNICEF-it që nga janari i këtij viti, duke përdorur influencën e tij për kauza humanitare.