Një ngjarje tragjike ka ndodhur të martën në mbrëmje në plazhin Karon, në Phuket, Tajlandë, ku një grua shqiptare, vetëm disa orë pas mbërritjes së saj për pushime, humbi jetën pas mbytjes në det.

Sipas autoriteteve lokale, viktima është identifikuar si Daniela Idrizi, 41 vjeçe. Ajo u shpall zyrtarisht e vdekur në Spitalin Chalong, rreth orës 18:00 të datës 10 qershor.

Bashkëshorti i saj, Mohamed Alsaba, 43 vjeç nga Egjipti, ka dëshmuar se çifti kishte mbërritur në ishull po atë ditë, rreth orës 14:00, dhe ishin akomoduar në një hotel në zonën Tambon Karon. Ata kishin planifikuar një qëndrim tre-ditor në këtë destinacion turistik.

Vetëm dy orë më pas, rreth orës 16:00, ata shkuan në plazh për të pushuar. Sipas bashkëshortit, Daniela hyri në det për të notuar, por pas rreth 10 minutash nisi të hasë vështirësi në ujë dhe u mbyt, pa mundur të ndihmohej në kohë nga pushuesit apo rojet bregdetare.

Rojet ndërhynë dhe e nxorën nga uji në gjendje të pandërgjegjshme. Pavarësisht përpjekjeve të personelit mjekësor në spitalin e zonës, ajo nuk mundi të rikthehej në jetë.

Autoritetet tajlandeze kanë nisur një hetim për zbardhjen e rrethanave të plota të kësaj ngjarjeje, ndërsa trupi i pajetë i 41-vjeçares pritet t’i nënshtrohet autopsisë.

Ambasada shqiptare në Bangkok është informuar dhe po ndjek të gjitha procedurat për riatdhesimin e trupit si dhe mbështetjen e familjes së viktimës.