Manchester, 17 qershor 2025 – Katër persona, mes tyre dy shtetas shqiptarë, janë arrestuar nga Agjencia Kombëtare e Krimit (NCA) në kuadër të një operacioni të zgjeruar kundër kontrabandës së kokainës përmes aeroportit të Manchesterit.
Të arrestuarit janë identifikuar si Dale Hosker, 49 vjeç, nga Palatine Road, Bury; Dale Creen, 34 vjeç, nga Mere Fold, Worsley; Elton Hallaçi, 31 vjeç, shqiptar me banim në Adlam Road, Liverpool; dhe Artur Iseberi, 27 vjeç, gjithashtu shqiptar, nga Aintree Lane, Liverpool.
Sipas zëdhënësit të NCA-së, arrestimet janë pjesë e një hetimi të gjatë që synon të godasë rrjetet e kontrabandës së lëndëve narkotike të klasit A. Personat në fjalë dyshohet se kanë qenë të përfshirë në trafikimin e kokainës në muajin maj të vitit 2024 përmes linjave ajrore që mbërrijnë në aeroportin ndërkombëtar të Manchesterit.
Gjatë operacionit të zhvilluar më 17 qershor në zona të ndryshme të Greater Manchester dhe Liverpool, janë arrestuar gjithsej gjashtë persona, ndërsa dy të tjerë janë lënë të lirë me kusht në pritje të vijimit të hetimeve.
Arrestimet përfshinë edhe bastisje në dy prona në Fazakerley, Liverpool, ku u ndaluan dy shtetas shqiptarë të moshave të ndryshme, të cilët aktualisht ndodhen në paraburgim për marrje në pyetje.
“NCA punon në vend dhe jashtë tij për të luftuar kërcënimin nga trafiku i drogërave të klasit A. Këto arrestime përfaqësojnë një hap të rëndësishëm në ndalimin e këtij aktiviteti kriminal me ndikim të rëndë në shoqëri,” deklaroi zëdhënësi i agjencisë.
Hetimet vazhdojnë ndërsa autoritetet po analizojnë të dhëna të mëtejshme që mund të çojnë në identifikimin e rrjetit të plotë dhe mënyrave të operimit të tij.
