Në një tjetër përshkallëzim të tensioneve në Lindjen e Mesme, ushtria iraniane publikoi pamje që tregojnë rrëzimin e një droni ushtarak në qytetin Isfahan.

Autoritetet iraniane njoftuan se droni i rrëzuar ishte i Forcave të Mbrojtjes së Izraelit (IDF), një informacion që më pas u konfirmua nga vetë ushtria izraelite, e cila pranoi se një prej dronëve të tyre ishte rrëzuar nga një raketë tokë-ajër në atë zonë.

Pamjet e publikuara nga ushtria iraniane tregojnë mbetjet e copëzuara të dronit, të shpërndara në një zonë shkretinore pranë Isfahanit, sipas raportimit të Skynews.

Ky incident vjen në kulmin e një periudhe shumë të tensionuar mes Iranit dhe Izraelit, ku shkëmbimi i sulmeve ajrore dhe raketore po rrit shqetësimet për një përshkallëzim të mëtejshëm të konfliktit në rajon.