Irani po përballet me një situatë të jashtëzakonshme në fushën digjitale dhe financiare, pas një serie sulmesh kibernetike që kanë prekur në mënyrë të rëndë infrastrukturën e internetit, bankat dhe tregtinë me kriptovaluta në vend.

Ministria e Teknologjisë dhe Informacionit konfirmoi vendosjen e kufizimeve në aksesin në internet, duke akuzuar Izraelin për “keqpërdorim të rrjetit kombëtar të komunikimit për qëllime ushtarake”. Megjithatë, autoritetet theksuan se platformat dhe shërbimet vendase mbeten funksionale, duke shmangur një kolaps total të sistemit.

Një nga goditjet më të rëndësishme ishte ndaj platformës më të madhe iraniane për tregtimin e kriptovalutave, Nobitex, e cila doli jashtë funksioni për shkak të një “kërcënimi të sigurisë”. Grupi i njohur haktivist Predatory Sparrow mori përgjegjësinë për sulmin, duke akuzuar Nobitex se përdorej për shmangie të sanksioneve ndërkombëtare dhe financim të aktiviteteve terroriste.

Sulmet nuk u ndalën këtu: të njëjtin grup e kanë lidhur edhe me goditjet ndaj Bankës Sepah, e cila është e lidhur me forcat e armatosura iraniane, dhe Bankës Pasargad, duke nxitur shqetësime për stabilitetin financiar të vendit në një moment të vështirë ekonomik dhe politik.

Megjithatë, zëdhënësja e qeverisë iraniane, Fatemeh Mohajerani, përpiqej të qetësonte opinionin publik duke siguruar se “fondet publike janë të sigurta” dhe nuk ka rrezik për depozituesit.

Kriptovalutat janë bërë një mjet i rëndësishëm për shumë iranianë për të ruajtur vlerën e parasë dhe për të kryer transaksione, veçanërisht në një periudhë kur vendi është i goditur nga sanksionet ndërkombëtare dhe një krizë ekonomike e thellë.

Situata mbetet e paqëndrueshme, ndërsa Irani përballet me sfida të mëdha në mbrojtjen e infrastrukturës së tij kibernetike dhe financiare në një kontekst të përshkallëzuar të tensioneve rajonale dhe presionit ndërkombëtar.