MOSKË – Presidenti rus Vladimir Putin ka reaguar ndaj përshkallëzimit të rrezikshëm në Lindjen e Mesme, duke u bërë thirrje të gjitha palëve të përfshira që të kërkojnë rrugë paqeje për t’i dhënë fund luftimeve mes Izraelit dhe Iranit. Nga Kremlini, ai deklaroi se Rusia ka përcjellë “idetë e saj konkrete” për zgjidhjen e krizës, ndërsa theksoi se shoqëria iraniane, përkundër deklaratave izraelite për ndryshim regjimi, po bashkohet rreth udhëheqjes së Republikës Islamike.

“Çdo përpjekje për të tronditur stabilitetin e Iranit do të çonte vetëm në më shumë gjakderdhje dhe kaos në rajon,” u shpreh Putin përpara drejtuesve të agjencive kryesore të lajmeve.

Në një tjetër zhvillim me peshë strategjike, Kremlini konfirmoi se Rusia dhe Kina do të organizojnë stërvitje të përbashkëta ushtarake në vitin 2025 – një sinjal i qartë për Perëndimin mbi aleancat gjithnjë e më të konsoliduara në frontin lindor.

Putin gjithashtu u shpreh i gatshëm për të zhvilluar një bisedë me kancelarin e ri gjerman Friedrich Merz, duke lënë të hapur një dritare për dialog me Berlinin. Megjithatë, ai la të kuptohet se nuk ka shumë besim te Gjermania si ndërmjetëse për negociatat me Ukrainën.

“Ne jemi gjithmonë të hapur për dialog, por ndërmjetësit duhet të jenë të paanshëm dhe të besueshëm,” tha presidenti rus, në një deklaratë që duket se godet besueshmërinë aktuale të diplomacisë gjermane.

Ndërkohë që bota ndjek me shqetësim zhvillimet në Lindjen e Mesme dhe në frontin ukrainas, Kremlini po pozicionon veten si lojtar kyç në çdo negociatë globale.