TIRANË – Një tjetër goditje kibernetike ka tronditur institucionet publike shqiptare. Grupi i njohur i hakerëve “Homeland Justice” ka marrë sot publikisht përgjegjësinë për një sulm ndaj serverëve të Bashkisë së Tiranës, duke pretenduar se kanë ndërprerë funksionimin e faqes zyrtare të institucionit, kanë nxjerrë të dhëna të ndjeshme dhe kanë fshirë të gjitha të dhënat nga serverët.

Në një mesazh të publikuar në kanalin e tyre zyrtar në Telegram, grupi shkruan:

“Të gjitha këto aktivitete janë kryer nga Bashkia e Tiranës, sot ata po ndëshkohen për veprimet e tyre. Ne kemi rrëzuar faqen e tyre, kemi marrë të dhënat dhe kemi fshirë serverët.”

Së bashku me deklaratën, hakerët kanë shpërndarë edhe pamje para dhe pas sulmit, ku tregohet ndryshimi i faqes zyrtare të Bashkisë – nga versioni funksional në një ekran bosh me efekte vizuale të dëmtimit grafik, për të dëshmuar goditjen dixhitale.

Sulmi i paralajmëruar?

Në një tjetër element simbolik, “Homeland Justice” ka shpërndarë edhe një model 3D të godinës së Bashkisë, të mbivendosur me mbishkrimin: “Yes, you were right”, një frazë që shihet si konfirmim i një paralajmërimi të mëhershëm për këtë sulm.

Deri më tani, Bashkia e Tiranës nuk ka dhënë një reagim zyrtar, ndërkohë që ekspertët e IT-së në institucionet shtetërore janë duke verifikuar shkallën reale të dëmit, përfshirë nëse të dhënat e publikuara janë autentike dhe çfarë përmbajnë ato.

Ky është sulmi i dytë serioz kibernetik ndaj institucioneve shqiptare brenda pak muajsh, duke rritur alarmin mbi sigurinë dixhitale dhe mbrojtjen e të dhënave në administratën publike. Autoritetet pritet të nisin hetime në bashkëpunim me partnerët ndërkombëtarë për të zbuluar origjinën dhe përmasat e këtij sulmi.