Chios, Greqi – 24 qershor 2025 – Autoritetet greke kanë shpallur gjendjen e jashtëzakonshme në ishullin Chios, një prej ishujve më të mëdhenj në Egjeun Lindor, për shkak të zjarreve masive që po shkatërrojnë mijëra hektarë pyje dhe zona të banuara.

Vendimi, i marrë pas kërkesës së bashkisë lokale, u konfirmua nga Sekretari i Përgjithshëm i Mbrojtjes Civile, Nikolaos Papaevstathiou, dhe do të vijojë deri më 22 korrik 2025.

Zjarret shkatërruese, erërat e forta përshpejtojnë përhapjen

Sipas meteorologëve, deri tani janë djegur rreth 25 mijë hektarë tokë, ndërsa zjarret vazhdojnë të përhapen me shpejtësi për shkak të erërave të forta. Tymi nga flakët është përhapur deri në 500 kilometra larg, duke arritur edhe në ishullin e Kretës.

Aktualisht, në ishull janë aktive pesë vatra zjarri në zona të ndryshme. Në përpjekjet për shuarjen e zjarreve janë të angazhuar mbi 190 zjarrfikës, të cilët mbërrijnë në ndihmë nga Athina, Selaniku, Kavalla dhe Lesvosi.

Përveç forcave tokësore, në operacionin e fikjes së flakëve po marrin pjesë edhe 4 avionë dhe 13 helikopterë, ndërsa ushtria greke po jep ndihmë logjistike dhe operacionale.

Evakuime dhe paralajmërime për banorët

Për shkak të rrezikut të lartë, autoritetet kanë urdhëruar evakuimin e katër fshatrave në jugperëndim të ishullit: Vessa, Lithi, Elata dhe Armolia. Ndërkohë, banorët e fshatit Leptopoda në veri janë paralajmëruar për një evakuim të mundshëm në ditët në vijim.

Situata në Chios konsiderohet tejet kritike, ndërsa autoritetet bëjnë thirrje të vazhdueshme që qytetarët të ndjekin me kujdes udhëzimet zyrtare për të shmangur rreziqet për jetën dhe pronat e tyre