Katari ka reaguar ashpër pas sulmit të Gardës Revolucionare të Iranit ndaj bazës ajrore amerikane Al-Udeid, duke e cilësuar incidentin si një shkelje flagrante të sovranitetit të tij kombëtar dhe të ligjit ndërkombëtar.

Zëdhënësi i Ministrisë së Jashtme të Katarit, Majed al-Ansari, në një deklaratë zyrtare në platformën X, tha:

“Ne e konsiderojmë këtë shkelje flagrante të sovranitetit të shtetit të Katarit, hapësirës së tij ajrore, ligjit ndërkombëtar dhe Kartës së Kombeve të Bashkuara. Ne theksojmë se Katari rezervon të drejtën për t’u përgjigjur drejtpërdrejt dhe në mënyrë të barabartë me natyrën dhe shkallën e këtij agresioni.”

Ministria e Mbrojtjes e Katarit konfirmoi se nuk ka pasur viktima apo të lënduar, ndërsa sistemet e mbrojtjes ajrore kanë interceptuar me sukses raketat iraniane, duke shmangur dëmet në bazën e ndodhur afër kryeqytetit Doha.

Në një deklaratë tjetër, autoritetet qetësuan publikun:

“Jemi të sigurt se mbrojtja ajrore e Katarit e pengoi me sukses sulmin dhe interceptoi raketat iraniane. Faleminderit Zotit, vigjilenca e forcave tona të armatosura dhe masat paraprake të marra bënë të mundur që incidenti të mos shkaktojë asnjë humbje jete apo të plagosur.”

Zyrtarët qeveritarë siguruan se hapësira ajrore dhe territori i Katarit janë të mbrojtura, por theksuan se vendi ruan të drejtën për të reaguar në përputhje me ligjin ndërkombëtar.

Ky zhvillim vjen në një moment tensioni të lartë në rajon, pas sulmeve ajrore të Shteteve të Bashkuara mbi objektet bërthamore të Iranit dhe kërcënimeve të hapura nga Teherani për hakmarrje ndaj interesave amerikane në Lindjen e Mesme. Sulmi ndaj bazës Al-Udeid shihet si një eskalim i rrezikshëm, që mund të zgjerojë më tej përplasjet në rajon.