Presidenti i Shteteve të Bashkuara, Donald Trump, ndodhet aktualisht në Krahun Perëndimor të Shtëpisë së Bardhë, ku pritet të zhvillohet një mbledhje urgjente e Këshillit të Sigurisë Kombëtare, pas sulmeve të fundit mes SHBA-së dhe Iranit.

Sipas raportimeve të mediave ndërkombëtare, marinsat amerikanë janë pozicionuar jashtë derës së ndërtesës, një sinjal protokollar se presidenti ndodhet brenda dhe se një mbledhje e sigurisë në nivelet më të larta është duke u zhvilluar.

Ndërkohë, media shtetërore iraniane Tasnim raporton se Irani ka nisur përgjigjen e tij “të fuqishme dhe fitimtare” ndaj sulmeve amerikane, duke lëshuar raketa drejt bazave amerikane në Katar dhe Irak.

Raportime të pakonfirmuara ende nga burime perëndimore flasin për shpërthime të dëgjuara në Katar, veçanërisht pranë bazës ushtarake Al-Udeid, e cila strehon mijëra trupa amerikane dhe sisteme strategjike të mbrojtjes ajrore.

Në një deklaratë zyrtare, Garda Revolucionare e Iranit ka thënë:

“Irani nuk do të lërë pa përgjigje asnjë sulm ndaj integritetit të tij territorial, sovranitetit dhe sigurisë kombëtare në asnjë rrethanë.”

Kjo përshkallëzim i ri vjen pas sulmeve ajrore të SHBA-së ndaj objekteve bërthamore iraniane, të ndërmarra vetëm disa ditë më parë, duke rritur ndjeshëm rrezikun e një përplasjeje të gjerë ushtarake në rajon.

Tensionet janë në nivelet më të larta që nga viti 2020, ndërsa vëmendja globale është tani e përqendruar në vendimet që do të merren brenda mureve të Këshillit të Sigurisë Kombëtare të SHBA-së, nën drejtimin e Presidentit Trump.