Një avion pasagjerësh i linjës American Airlines u detyrua të kthehet menjëherë në aeroportin Harry Reid në Las Vegas, pasi njëri prej motorëve mori flakë vetëm pak minuta pas ngritjes.

Ngjarja ndodhi të mërkurën në mëngjes, teksa aeroplani, i cili kishte si destinacion Charlotte, Karolina e Veriut, u përball me një emergjencë të papritur në ajër. Në bord ndodheshin 153 pasagjerë dhe gjashtë anëtarë të ekuipazhit, të cilët përjetuan momente paniku kur motori i majtë filloi të shpërndante tym të zi dhe flakë të dukshme, sipas dëshmive të pasagjerëve dhe pamjeve të shpërndara në rrjetet sociale.

Piloti reagoi me profesionalizëm, duke anuluar fluturimin dhe kthyer avionin për ulje të menjëhershme. Sipas zyrtarëve të linjës ajrore, ulja u krye në mënyrë të sigurt dhe nuk u raportuan persona të lënduar.

Pas incidentit, avioni iu nënshtrua një kontrolli të plotë teknik. Autoritetet amerikane të aviacionit civil kanë nisur një hetim për të përcaktuar shkakun e zjarrit në motor.

American Airlines tha në një deklaratë se po bashkëpunon ngushtësisht me hetuesit dhe se do të ofrojë mbështetje dhe akomodim për pasagjerët e prekur nga incidenti.