Vlorë – Një ngjarje e rëndë ka tronditur qytetin bregdetar mëngjesin e sotëm. Një 72-vjeçar është gjetur i vetëvarur nga familjarët në një pallat në ndërtim në lagjen “Pavarësia”, ku i moshuari punonte si roje.

Sipas informacioneve paraprake, dyshohet se viktima ndodhej në kushte të rënda psikologjike, çka mund ta ketë shtyrë drejt aktit ekstrem. Trupi i pajetë është gjetur nga të afërmit, të cilët menjëherë njoftuan policinë.

Në vendngjarje kanë mbërritur forcat e rendit dhe grupi hetimor, të cilët kanë nisur hetimet për të zbardhur plotësisht rrethanat e ngjarjes. Deri tani nuk ka dyshime për ndonjë ndërhyrje të palëve të treta.

Policia vijon punën për dokumentimin e plotë të rastit, ndërsa trupi i të ndjerit është dërguar në morg për ekspertizë mjeko-ligjore.