Londër – Një 29-vjeçar shqiptar është arrestuar në Britaninë e Madhe nën akuzën e intimidimit dhe kërcënimit me publikimin e materialeve intime, ngjarje që ka ndodhur në Shqipëri në fund të vitit 2020. Flamur Gega u ndalua nga autoritetet britanike dhe u paraqit përpara Gjykatës së Ekstradimeve Westminster Magistrates Court të enjten.

Sipas dokumenteve të gjykatës, të cilat janë siguruar nga Top Channel, Gega ishte shpallur në kërkim nga drejtësia shqiptare pasi më 20 dhjetor 2020 kishte kërcënuar një vajzë se do të shpërndante foto dhe pamje intime, duke i shkaktuar viktimës frikë dhe pasiguri për jetën.

Arrestimi i tij është kryer për llogari të Interpol Tiranës, si pjesë e një bashkëpunimi ndërkombëtar për kapjen e personave në kërkim.

Gega do të qëndrojë në paraburgim në burgun HMP Wandsworth deri në seancën e radhës për procesin e ekstradimit, e cila është caktuar për më 3 korrik 2025.

Autoritetet shqiptare kanë nisur procedurat ligjore për të mundësuar rikthimin e tij në vend, ku do të përballet me drejtësinë për veprat penale që i ngarkohen.