Tiranë – Ish-deputeti i Partisë Demokratike, sot zyrtar dhe kandidat për zgjedhjet vendore të 11 majit nën siglën e Partisë Socialiste, Halit Valteri, ka dhënë një dëshmi befasuese para trupës gjykuese të GJKKO, ku ka pranuar se ka shfrytëzuar politikisht tragjedinë e familjes Maloku për të rritur profilin e tij si politikan i opozitës në vitin 2019.

Ngjarja në fjalë lidhet me atentatin ndaj ish-prokurorit Arjan Ndoja, ku mbeti i vrarë Andi Maloku, shoferi i tij. Në një interpelancë të asaj kohe në Kuvendin e Shqipërisë, Valteri përmendi emra të ndryshëm që lidheshin me çështjen, përfshirë zyrtarë policie dhe emra të dyshuar të botës së krimit.

“Genci Malokun e kam njohur pak ditë pasi djali i tij ndërroi jetë. Ai më tha: ‘Më kanë vrarë djalin, kam videot e atyre që ma kanë bërë’. Më dha një tablet ku shfaqeshin dy persona, një me kapele, një pa kapele,” u shpreh Valteri në sallën e gjyqit.
“Më kërkoi të flisja në Parlament për zbardhjen e ngjarjes dhe unë e bëra, përmenda disa emra që më kishte dhënë ai. Kam folur në emër të tij. E kam shfrytëzuar këtë çështje politikisht për të marrë kredencialet e mia si deputet i opozitës,” pranoi Valteri para GJKKO-së.

Ish-deputeti përmendi gjithashtu se pas fjalës së tij në Kuvend kishte marrë një telefonatë nga Ramazan Rraja, një emër i njohur për autoritetet, i cili i kishte kërkuar llogari për përmendjen e emrit të tij dhe të Lenti Rrajës, por sipas Valterit, nuk kishte pasur kërcënim të drejtpërdrejtë.

“Ramazani më tha: ‘Pse na ke përmendur emrat?’ Telefonata ishte në WhatsApp,” deklaroi ai.

Pretendime për inskenim politik

Avokati i Elvis Dervishajt, një tjetër i përfshirë në çështje, pretendoi se gjithë veprimtaria e Valterit kishte qenë e stisur nga Arjan Ndoja dhe ish-ministri i Brendshëm Sandër Lleshaj.

“Kërkojmë që të administrohen bisedat mes Halit Valterit dhe Arjan Ndojës. E gjithë historia është inskenuar,” tha avokati në sallën e gjyqit.

Deklaratat e Valterit kanë nxitur reagime të forta në opinionin publik dhe në radhët e klasës politike, për mënyrën se si një tragjedi është përdorur për përfitime personale dhe politike.

Procesi në GJKKO vijon, ndërsa priten zhvillime të mëtejshme lidhur me dëshmitë dhe administrimin e provave të reja.