New York – Në përfundim të argumenteve të saj në gjyqin ndaj reperit dhe producentit të njohur Sean “Diddy” Combs, prokuroria paraqiti akuza të rënda për përdorim dhune, trafikim seksual dhe mashtrim me qëllim detyrimin e grave për të kryer marrëdhënie seksuale të padëshiruara.

Ndihmësprokurorja Christy Slavik deklaroi përpara jurisë se Combs drejton një organizatë kriminale që përdor manipulimin dhe presionin për të mos pranuar përgjigje “jo” nga viktimat. Sipas saj, reperi ka përdorur një kombinim të dhunës, trafikut seksual dhe shantazhit, duke përfshirë edhe një rast të dhunës ndaj ish-të dashurës së tij, Cassie Ventura.

Në sallën e gjyqit u shfaq edhe një video e vitit 2016 ku shihet Combs duke tërhequr dhe rrahur Ventura-n në një hotel në Los Angeles. Prokuroria paraqiti dëshmi nga ish-të dashurat e tij, përfshirë Cassie Venturën dhe një grua të njohur vetëm si “Jane”, të cilat dëshmuan për manipulimin dhe abuzimin e përjetuar.

Sean “Diddy” Combs është deklaruar i pafajshëm për të gjitha akuzat, përfshirë trafikimin seksual, shantazhin dhe organizimin e prostitucionit. Nëse shpallet fajtor, reperi rrezikon burgim të përjetshëm.