Vlorë, 30 qershor – Një zjarr ka rënë pasditen e sotme në zonën e Jallit të Nartës, në vendgrumbullimin e inerteve, ku sipas informacioneve paraprake hedhen edhe goma automjetesh dhe materiale plastike.

Zjarrfikësit janë angazhuar në vendin e ngjarjes, ku po punojnë për vënien e flakëve nën kontroll. Ende nuk ka të dhëna për përmasat e dëmit apo për ndonjë shkak të konfirmuar zyrtarisht, por për shkak të natyrës së materialeve të djegshme, situata po mbahet nën monitorim të rreptë nga autoritetet lokale.

Ky nuk është rasti i parë në këtë zonë. Disa ditë më parë, në fushën e mbetjeve, shumë pranë vendgrumbullimit të inerteve, u regjistrua një tjetër zjarr, i cili krijoi një situatë të rënduar për qytetin e Vlorës, për shkak të ndotjes së ajrit dhe tymit të dendur.

Banorët e zonës kanë ngritur shqetësime të përsëritura për rrezikun që paraqet djegia e materialeve plastike dhe gomave në ambiente të hapura, duke bërë thirrje për masa më të rrepta nga autoritetet mjedisore dhe pushteti vendor.

Hetimet për shkaqet e zjarrit kanë nisur, ndërsa situata vijon të jetë në ndjekje të forcave zjarrfikëse dhe emergjencave civile