Kryeministri izraelit Benjamin Netanyahu është shprehur me tone të forta për të ardhmen e Gazës, duke deklaruar se “Nuk do të ketë më Hamas. Nuk do të ketë Hamastan. Ne nuk do të kthehemi më tek e shkuara. Ka mbaruar.”

Deklarata e tij vjen në një moment të tensionuar, ndërsa Hamasi ka përsëritur gatishmërinë për një marrëveshje armëpushimi që çon në përfundimin e plotë të luftës, por ka refuzuar propozimin 60-ditor të presidentit amerikan Donald Trump.

Sipas një deklarate zyrtare, Hamasi kërkon një marrëveshje që të përfshijë tërheqjen e plotë të forcave izraelite nga Gaza, duke e bërë të qartë se nuk do të pranojë një armëpushim të përkohshëm pa garanci për fundin e ofensivës.

Ndërkohë, në Kajro është zhvilluar një takim i rëndësishëm mes një delegacioni të Hamasit dhe ndërmjetësuesve egjiptianë e katarianë, në përpjekje për të rigjallëruar dialogun diplomatik.

Situata mbetet kritike, mes një klime të ngarkuar ushtarake dhe presioni në rritje ndërkombëtar për një zgjidhje afatgjatë të konfliktit.