Një aksident i rëndë ka ndodhur pasditen e sotme në aksin Fushë Arrëz–Kryezi–Iballë, ku një motor me turistë sllovakë është përplasur me një automjet.
Sipas njoftimit zyrtar të policisë, ngjarja ka ndodhur në fshatin Kryezi, ku shtetasi sllovak Z. S., duke drejtuar motomjetin, është përplasur me një automjet të drejtuar nga shtetasi shqiptar R. V.. Si pasojë e përplasjes, motori është rrëzuar dhe të dy turistët kanë pësuar dëmtime të rënda.
Z. S. ka ndërruar jetë në Spitalin e Pukës, ndërsa pasagjerja në motor, shtetasja B. T., ndodhet në gjendje të rëndë dhe po transportohet me helikopter drejt Tiranës për ndihmë të specializuar.
Në vendngjarje ndodhet grupi hetimor, i cili po punon për sqarimin e plotë të rrethanave të aksidentit. Deri tani nuk ka informacione zyrtare për shkaqet që çuan në përplasjen fatale.
Autoritetet kanë apeluar për kujdes të shtuar në rrugët malore dhe turistike, të cilat këto ditë verore frekuentohen nga shumë turistë vendas e të huaj.
