Një aksion i gjerë policor është zhvilluar sot në zyrat qendrore të kompanisë “Bankers Petroleum” në Marinëz të Fierit, ku janë arrestuar ish-drejtori i kompanisë, Leonidha Çobo, dhe drejtori aktual, Hongping Xiao.

Sipas informacioneve paraprake, kontrollet dhe arrestimet lidhen me dyshimet për mospagim të detyrimeve fiskale ndaj shtetit shqiptar. Në operacion janë përfshirë forca policore, zyrtarë të Tatimeve dhe hetues të specializuar, të cilët kanë sekuestruar dokumentacion brenda ambienteve të kompanisë.

Kompania “Bankers Petroleum”, e cila operon në sektorin e naftënxjerrjes, është akuar më herët për shmangie tatimore dhe ndotje të mjedisit, çështje për të cilat janë zhvilluar hetime dhe janë ngritur ankesa nga banorët e zonës.

Burime nga grupi hetimor bëjnë me dije se kontrollet po vijojnë, ndërsa arrestimet janë bërë në kuadër të një procedimi penal për shkelje të ligjit mbi tatimet dhe ndotjen mjedisore.

Autoritetet nuk kanë dhënë ende një deklaratë zyrtare të detajuar mbi akuzat konkrete, por më shumë informacion pritet në orët në vijim.