Një incident i papritur ka ndodhur gjatë koncertit të Post Malone në Arizona, ku këngëtari ra nga skena ndërsa po i afrohej një fansi për të ngritur një dolli.
Momenti është kapur në video dhe është bërë virale në rrjetet sociale. Në pamjet që po qarkullojnë gjerësisht, shihet se një fans ngre gotën e tij drejt këngëtarit gjatë interpretimit të këngës “Pour Me a Drink”. Post Malone, gjithashtu me një gotë në dorë, i afrohet duke kënduar, gjunjëzohet për të përshëndetur fansin, por një pjesë e skenës shembet dhe ai rrëzohet.
Fatmirësisht, 30-vjeçari nuk pësoi lëndime serioze dhe, në një moment që ka habitur publikun, u ngrit menjëherë duke vazhduar performancën dhe pa lëshuar gotën nga dora.
Fansat reaguan me duartrokitje dhe admirim për profesionalizmin dhe qëndrueshmërinë e yllit të muzikës, ndërsa organizatorët konfirmuan se po bëhen kontrolle sigurie shtesë për pjesët teknike të skenës për të shmangur situata të ngjashme në të ardhmen.
